Die Sneeukoningin 2 binnekort in fliekteaters

0
33

Die Sneeukoningin 2Die Sneeukoningin 2 – Die stryd tussen goed en sleg duur voort …Orm, Gerda, Kai, Alfida en Luta is terug met ’n splinternuwe avontuur om die nare Sneeukoningin te verslaan in die tweede aflewering van die gewilde animasieprent, Die Sneeukoningin, wat beloof om kykers tot op die laaste minuut te boei en bekoor.

Die tekenprent is gebaseer op die oorspronklike klassieke sprokie (The Snow Queen) wat deur Hans Christian Andersen geskryf en in 1845 vir die eerste keer gepubliseer is. Die verhaal gaan oor die stryd tussen goed en sleg, wat deur ’n klein seuntjie en dogtertjie – Gerda en haar broertjie Kai – aangesê word en die avontuur en vriende op hulle pad, wat hulle uiteindelik tot oorwinning lei.

In Die Sneeukoningin 2 word die storie verder vertel, met Orm in die kollig. Nadat die Sneeukoningin oorwin is, geniet die trolle hulle vryheid en hulle dorpie floreer onder die leiding van hulle bekwame koning. Wanneer Orm se alter-ego hom egter keer-op-keer in die moeilikheid laat beland, verloor hy die huis waarin hy en sy ouma bly en sy werk en moet hy plan maak om te oorleef. Maar in plaas daarvan om sy vriende se hulp in te roep, maak hy staat op leuens en grootpraterigheid om sy saak te bevorder. Hierdie leuens vervreem hom nie net van Gerda en Kai nie, maar sneeubal tot in so ’n mate dat hy en sy vriende in lewensgevaar beland. Dit lei tot ’n naelbyt-stryd wat hom dwing om sy eie swakheid te konfronteer ten einde sy vriende van die ewige koue te red. In hierdie betowerende sprokie leer Orm dat ’n mens nie vriende, geluk en ware liefde deur middel van bedrog kan kry nie.

- Advertisement -

Die Sneeukoningin 2Hoewel die meeste van die ou gunstelingkarakters steeds in die ysige wonderland woon, stel Die Sneeukoningin 2 nog ’n paar oulike siele aan die kykers voor, soos Generaal Arrog, Ouma Rose, Prinses Maribel, en vele meer, wat sommer dadelik diep in jou hart kruip.

Ghoema en Tempo-wenner (Beste Nuweling, Beste Liedjie en Beste Musiekvideo), Leah, sing nie net die feëverhaal se temalied nie, maar is ook die stem van die film se heldin – Gerda. Maak My Dag, geskryf deur Johan Vorster en Christoph Kotze, is ’n splinternuwe enkelsnit wat in Oktober 2016 vrygestel is as deel van die Deluxe weergawe van haar album, Wonderwerk. Volgens Leah wou sy nog altyd deel wees van ’n animasierolprent, maar haar eerste liefde is om op die verhoog op te tree. “Om ’n stem in ’n animasierolprent te wees, was nog altyd iets wat ek wou doen en dit was ’n nuwe uitdaging. Ek geniet dit om met my stem te speel en natuurlik toneel te speel, so ek sal dit verseker meer wil doen,” sê sy.

Die Sneeukoningin 2“As ek nou doodeerlik moet wees, is om op die verhoog te wees ’n kortkoppie voor, want dan is dit net ek, my musiek en wat jy sien, is wat jy kry. Maar dit was ’n wonderlike ervaring en ek is bitter dankbaar vir die geleentheid.” Oor die temalied verklap sy dat sy binne minute gaande was daaroor toe sy dit vir die eerste keer hoor. “Die liedjie is regtig ‘ek’. Dit gaan oor jou ander helfte, of eintlik enigiemand, wat jou dag kan ophelder met ’n glimlag,” sê sy.

“Partykeer moet ons net vergeet van al die negatiwiteit, alles laat gaan en uit jou maag uit lag. Dit is die beste as jy iemand in jou lewe het wat jou so kan laat lag.” Die enkelsnit is dus die perfekte pasmaat vir hierdie sprokiesverhaal, wat juis vriendskap, geluk en eerlikheid wil inspireer.

Die Sneeukoningin 2Van die ander karakterstemme word vertolk deur Pierre Breytenbach (Orm), Christine Voorendyk (Alfida) en Richard van der Westhuizen is Generaal Arrog. Nog bekende stemme wat in die fliek gehoor kan word, sluit Lochn
er De Kock, Heidi Mollentze, Leila Etsebeth en Anton Dekker in. Die stemregie vir Die Sneeukoningin 2 is behartig deur Riana Wilkens en die klankbaan is deur Mark Willott, ’n Emmy-bekroonde komponis uit die Middelande van die Verenigde Koninkryk, behartig.

Die Sneeukoningin 2 is deur Wizart Animation en Bazelevs Groep in Rusland vervaardig, met Alexey Tsitsilin as die regisseur en Tsitsilin, Alexey Zamyslov en Vladimir Nikolaev as draaiboekskrywers. Timur Bekmambetov, Yuri Moskvin, Vladimir Nikolaev en Diana Yurinova is die vervaardigers. Die sprokie was een van 17 animasieprente wat in 2014 die Golden Globe-kortlys gehaal het en is reeds uitgereik in teaters in die Verenigde Koninkryk, Suid-Korea, die Midde-Ooste, Baltiese State, Rusland, die Statebond van Onafhanklike State, Kroasië, Serbië, Montenegro, Bosnië en Herzegovina, Albanië, Slovenië, Macedonië en Israel en het in die lande waar dit uitgereik is, twee keer soveel as die eerste rolprent verdien.

Die Sneeukoningin 2 neem kykers op ’n prettige, emosionele avontuur, vol lewenslesse en humor, waarin die spieël weereens as die instrument van oorwinning gebruik word – want dit is eers wanneer Orm sy stryd teen die trol in die spieël wen, dat hy regtig vry en gelukkig kan wees. Dit is beslis ’n moet-kyk vir sprokieliefhebbers en klein ogies wat daarvan hou om weggevoer te word na ’n towerland vol opwinding. Die film word op 25 November 2016 in teaters landswyd vrygestel en word deur Indigenous Film Distribution in Suid-Afrika uitgereik.

SOSIALEMEDIASKAKELS: Facebook en Lokprent/Youtube

Leave a Reply