Ghoema-bekroonde groep stel nuwe video vry!

0
45
Die Ghoema-bekroonde groep, Kaleidoskoop, het pas 'n nuwe musiekvideo vrygestel!
Die Ghoema-bekroonde groep, Kaleidoskoop, het pas ‘n nuwe musiekvideo vrygestel!

“VLUGVOETIG se musiekvideo is een groot Kaleidoskopiese partytjie van kleur, ritme en genotvolle danspassies – in ’n egte Swing-dansstyl uit die vyftigs! Die liefdesverhaal wat afspeel, is een van hoop vir die sogenaamde bleeksiele wat duidelik met hulle unieke danspassies óók ’n meisie se hart kan verower! As jy nie luskry om te dans saam met hierdie jolige spulletjie nie, moet jy dalk die volumeknoppie net nóg ’n bietjie opdraai!,” sê Kaleidoskoop se Anique Jordaan oor die video van hulle nuutste enkelsnit wat pas op kykNET Top 20 bekendgestel is en almal aan die praat het.

Dit is die duo, wat bestaan uit Jouba en Anique Jordaan, se derde enkelsnitvrystelling vanaf hulle album, Gunsteling Seisoen, wat in 2018 ’n Ghoema-toekenning gewen het vir Beste Album deur ’n Groep / Duo. Hierdie opgewekte liedjie, met ’n voetjeuklekker Folk-Swing-styl, gaan oor ’n meisie wat onwillekeurig in ’n man se kop kom ronddans, is deur Jouba self geskryf en is ’n getuigskrif van die musiekpaar se liefde vir speelse ritmes, melodieë en mooi lirieke. “Saam met akoestiese kitaar- en klavierspel, kleur drie saksofone VLUGVOETIG verder in. Gideon Botes dra onverbeterlik by tot hierdie lied met sy kitaarsolos en Shaun Johannes lê ’n stewige fondament, vir die voete om te begin jeuk, met sy kontrabas,” verklap hulle.

- Advertisement -

Volgens die groep, is die musiekvideo by Nice To Meat You in Kemptonpark verfilm deur Paul Hugo (vervaardiger van Ubuntu Film House) en Jannes de Villiers. Die dekor en atmosfeer van die eetplek het presies gepas by die vintage-styl wat hulle vir die video in gedagte gehad het. Die storie speel af by ’n ‘Kaleidoskoop-dans’ in die vyftigerjare. Almal is aangetrek in daardie era se klere (deur Glare Modern Vintage) en Anique spog ook met ’n bypassende grimeer- en haarstyl, wat deur Jacqueline Tolken opgetower is. Dit skop af met ’n ‘mannekyn-uitdaging’ waar al die karakters in posisie moet vries om die illusie te skep dat die video op pause is.

“Daar is ’n pragtige meisie met wie almal wil dans, maar tussen die gewilde manne, met al die regte danspassies, het sy net oë vir die skynbare bleeksiel wat glad nie kan dans nie. Soos die manne haar wil nooi om ’n draai op die dansvloer te maak, spring haar vriendinne tussenin om die manne vir hulle self toe te eien en wys sy ook verskeie versoeke van die hand. Wanneer die bleeksiel uiteindelik genoeg moed bymekaar skraap om sy danspassies ten toon te stel, is die meisie dadelik verlief en besluit sy om wel met hóm te dans,” vertel Anique. “Hierdie video is meer opgewek as die ons vorige enkelsnit. Dit gaan kykers laat lus voel om te dans, almal sal aanklank vind daarby en die bleeksiel gaan maklik harte oorwen.”

Kaleidoskoop maak al vir meer as ’n dekade lank mu siek en is bekend vir die unieke en kleurvolle manier waarop hulle instrumente, klanke en lirieke soomloos kan laat saamsmelt om direk met die hart en siel te praat. Oor die jare, het hulle die land plat getoer, by van die grootste musiekfeeste opgetree, talle treffers oor die radio gehad en is hulle ook met ’n Huisgenoot Tempo-toekenning vereer vir Beste Kontemporêre Album in 2012.

VLUGVOETIG gaan beslis ’n gewilde keuse wees, onder oud en jonk, wanneer daar om die braaivleisvuur gekuier of oor die dansvloer geskoffel gaan word. Die enkelsnit is deel van die Gunsteling Seisoen-album en is aanlyn beskikbaar by: http://kaleidomusiek.co.za/album/gunstelling-seisoen/

Leave a Reply